Aroa Sío levanta os brazos tras 43 quilómetros

Aroa Sío apañou a vitoria no Trail Porto do Moniz, que se disputou onte na illa portuguesa de Madeira, onde a deportista viguesa adoita a ir a cotío para adestrar. A atleta de Coruxo foi a mellor na distancia ultra, de 43 quilómetros, e levantou os brazos despois dun esforzo de 5 horas 41 minutos e 9 segundos. Unha xesta para calqueira, o día a día para ela.

Sío liderou a proba de principio a fin. De saída, con noite pechada e focos nas cabezas para alumear o camiño, ata a chegada, xa baixo a luz do día. A viguesa non deu tregua ás súas rivais e comandou con firmeza unha proba que se levou cun amplo marxe sobre a segunda clasificada, Cristina Arreiol, que parou o cronómetro en 5h53:51. Ó terceiro chanzo do podio subiu Olga Sapach, cun tempo de 5h57:35. Todo, tras un esforzo moi esixente, con case 4.000 metros de desnivel positivo na Macaronesia lusa.