O legado de caricaturista Cao Luaces, na sede da Xunta en Vigo

Cao Luaces, nado en Cervo en 1862, comezou traballando na fábrica de Sargadelos deste concello lucense. Con 25 anos emigrou a Buenos Aires. Alí, logo dunha amplísima e prolífica traxectoria en diferentes publicacións da capital porteña, entre finais do século XIX e inicios do XX, o artista galego acadará prestixio internacional e será recoñecido como "patriarca da caricatura arxentina". Co seu influxo indirecto, Castelao creará a moderna escola galega de humor gráfico.

Este proxecto expositivo reúne unha escolma de caricaturas do artista a través das que se poñen de manifesto as distintas etapas polas que pasou o seu creador e que permiten admirar o talento e a habelencia dun debuxante galego excepcional que se erixiu como un dos grandes creadores desta forma de arte no seu tempo. Na súa itinerancia polas catro provincias galegas, iniciada o pasado mes de maio en Santiago de Compostela, a mostra chegou onte a Vigo para seguir difundindo entre a cidadanía a obra deste destacado debuxante de orixe lucense, escasamente coñecido en Galicia, que desenvolveu a súa traxectoria profesional principalmente en Arxentina. De Vigo pasará por Santiago, Pontevedra, Ourense, Lugo, Melide, Coruña para finalizar na sala de exposicións de Sargadelos en Cervo, onde rematará a itinerancia entre o 29 de novembro e o 20 de decembro. Completarase cun ciclo de conferencias a cargo do debuxante e xornalista Siro López co 10 de novembro na sala González Garcés da Coruña e o 29 de novembro en Cervo.n