A Universidade de Vigo aproba o centro do Celta

O Consello de Goberno da Universidade de Vigo deu onte luz verde ao convenio de cooperación que permitirá a posta en marcha dun novo centro adscrito co Celta e o centro universitario Euses Vigo, pertencente ao grupo Metrodora, e fíxoo coa mirada posta na posible futura implantación dunha oferta académica composta, inicialmente, por cinco titulacións: Psicoloxía, Enfermaría, Xestión Deportiva, Deseño e Arte para Videoxogos e Produción de Música e Son para a Industria do Entretemento.

O pasado mes de novembro, o Consello aprobara xa un primeiro memorando e na sesión de onte, deuse un novo paso adiante coa aprobación do convenio de cooperación no que se establecen os detalles da adscrición do centro Euses Vigo á Universidade viguesa, con instalacións distribuídas entre a Cidade Deportiva Afouteza, moi preto do campus de Vigo, e o estadio municipal de Balaídos, onde se fará un anexo.