Un gandeiro de Cuntis, ferido grave ao ser corneado por un boi

SUCESOS

O ferido tivo que ser trasladado uns 500 metros en padiola ata o punto onde agardaba o helicóptero, que o evacuou para recibir atención médica urxente

O ferido tivo que ser evacuado en helicóptero. | Emerxencias Cuntis

Un gandeiro de 61 anos, M.C.C., sufriu feridas graves esta mañá na aldea da Ermida, en Cuntis, ao ser corneado por un boi. O incidente mobilizou de inmediato os servizos de emerxencias.

Dous veciños foron os primeiros en auxiliar o gandeiro, alertados polos seus berros, e deron aviso ás autoridades. Ata o lugar desprazáronse efectivos do Servizo Municipal de Emerxencias de Cuntis, Policía Local, Garda Civil, unha ambulancia do 061 e o helicóptero do 061. O propio alcalde de Cuntis, Manuel Campos, tamén colaborou nas tarefas de rescate.

Debido á complexidade do terreo, o ferido tivo que ser trasladado uns 500 metros en padiola ata o punto onde agardaba o helicóptero, que o evacuou para recibir atención médica urxente.

Contenido patrocinado