Son dos premios máis importantes da literatura galega, convocados por Xerais e dotados con 10.000 euros, aos que concorreron este año máis de 80 obras. Finalmente, a xornalista María Solar, rostro coñecido da televisión galega e que xa ten una importante obra publicada, fíxose merecente do Premio Xerais, na súa 49 edición, con “Culpa”.
Esta novela, “a través dunha narración moi equilibrada e áxil”, en palabras do xurado, presenta un xogo de espellos entre dúas amigas e socias, “unha relación que comeza cunha clara manifestación de apoderamento persoal e feminino para se ir convertendo nunha submisión tóxica agoniante”.
Pola súa banda, o vigués Anxo Iglesias, profesor no IES Auga da Laxe de Gondomar, conseguiu o Premio Merlín de Literatura Infantil con “Unha nova dimensión”, no que é o seu primeiro libro. “A partir do concepto matemático de dimensión artéllase un delicioso libro de poemas onde prima a compoñente lúdica e imaxinativa que conecta directamente co mundo da infancia. A poesía entendida como xogo”, subliñou o xurado.
Asemade, o Premio Jules Verne de Literatura Xuvenil recaíu en Rocío Leira, escritora que xa recibira numerosos galardóns pola súa obra en poesía, relato curto e novela e que resultara finalista en dúas ocasións nesta mesma categoría, que finalmente conseguiu este ano con “Cicuta para dous”. É unha novela para público mozo “chea de intriga e humor, tinguida de pinceladas filosóficas que dan xogo para a reflexión”.
O xurado tamén recomenda a publicación da obra presentada baixo o título “O xogo da Casandra”.
Os libros gañadores chegarán ás librarías en novembro, coincidindo co acto de entrega dos galardóns.
