Feijoo, Reimóndez e Barbadillo gañan os Premios Xerais

As tres categorías dos Premios Xerais, galardonada cada unha con 10.000 euros, xa teñen propietario. “Ninguén contará a verdade”, do viguésPedro Feijoo(Vigo, 1975) fíxose co de Novela; “Furia”, de María Reimóndez (Lugo, 1975) fixo o propio co Jules Verne adicado á literatura xuvenil e unha debutante Leticia Barbadillo (Coruña, 1983) obtivo o Merlín de literatura infantil con “A botella das lentellas”.

As primeiras reaccións por parte dos protagonistas non se fixeron agardar. A través das redes sociais, Reimóndez explicou como de especial é “Furia” para ela. “Sono todas as novelas, pero esta é un chisco diferente; escribina para acoller ás que, por desgraza máis nova ca miña, perden as súas mais, para falar da perda e dos encontros, para falar da miña paixón polo boxeo, para falar de Vigo, de Rianxo, de Lugo, para falar do afecto e das vidas nas marxes”. Mais Reimóndez recoñece que sobre todo a xustifica “poder falar e seguir sentindo presente a miña mai que hoxe non estará comigo xa, mais que está en cada palabra que escribo, en cada cousa que me fai feliz e en cada alegría”. Con esta mensaxe a escritora agradeceu ao xurado por “escoitar esta voz furiosa”.

“Furia” impúxose as 28 obras que se presentaron á categoría, en palabras do xurado, “pola forza do argumento, o manexo da lingua e o carisma dos personaxes”. Considera que “a historia transmite uns valores moi positivos de superación e sacrificio”.

Barbadillo baseou a súa historia “A botella das lentellas” nun relato escrito para o 90 aniversario da súa avoa. Recoñece no seu muro de Facebook o seu abraio porque “hoxe hai por aí xente que di que é unha novela, unha novela premiada e que vai ser publicada”. Confesa que aínda que lle fai feliz “ata límites insospeitados, aínda non me entra na cabeza”. Para o xurado é merecedora do Premio Merlín sobre as outras 22 obras porque “é orixinal, está narrada cun estilo preciso e cun notable dominio léxico”. Destacan que a través dos relatos “unen tres xeracións dunha mesma familia; é unha singular e fermosa defensa do valor da ficción e do poder cativador dos contos”.

Feijóo foi o máis contido nun primeiro momento. Amais de dar os parabéns aos súas compañeiras de galardóns, declarou estar “moi feliz de corazón”, agradecéndollo a “quen o fixestes posible”, escribíu.

A súa novela competíu con 35 orixinais, mais o xurado escolleu “Ninguén contará a verdade” por ser un texto “de absoluta actualidade sobre a corrupción política e as súas consecuencias” e valoran “o gran traballo de investigación do autor”, onde os lectores “poden atopar referentes reais”. Destacan “diálogos sen fisuras, ritmo áxil ou meticulosas descripcións”.