O Concello de Nigrán rendeu homenaxe póstuma na mañá de onte a María García Domínguez, a que fora a propietaria do coñecido como 'O quiosco de Tito' da parroquia de Priegue e falecida o 7 de xuño de 2021. O Concello elixiu esta data porque este negocio vertebrador de toda unha parroquia se inaugurou o 16 de decembro de 1980.
No acto público, ao que acudíu veciñanza e familiares, o alcalde Juan González descubríu unha placa situada nun perpiaño ao carón do propio quiosco, que leva pechado desde hai sete anos.
"En recoñecemento a súa contribución ao desenvolvemento comercial en Priegue durante preto de 40 anos. A veciñanza de Priegue non esquecerá nunca este quiosco exemplar', di o texto inscrito, que agora quedará dun xeito permanente. O momento máis emotivo tivo lugar cando a súa neta leu un poema escrito pola súa tía Belén e cando 'Tito' recordou a súa muller. Ademais, o grupo de gaitas 'Malaherba' de Eixotolo amenizou o acto, no que tamén participaron veciños.
"Este quiosco forma parte da Historia de Priegue; convertíuse nun centro de reunión da veciñanza, nun lugar onde descubrir cada mañá as noticias e no que charlar. Un pequeno negocio que contribuíu á dinamización social e tamén cultural da zona", sinalou durante a súa intervención o alcalde nigranés, Juan González.
'O quiosco de Tito' (coñecido así popularmente) subministrou durante moitos anos prensa, revistas, cromos, chucherías... a adultos e crianzas de todo o municipio de Nigrán, convertíndose en todo un símbolo de Priegue nunha importante testemuña do desenvolvemento económico da parroquia e da totalidade do municipio.