Este martes pola mañá tomaron posesión novos cargos da Xunta, que forman parte da remodelación de Alfonso Rueda. Xuraron o seu cargo Roberto Barba como director xeral da Loita contra a Violencia de Xénero e María Quintiana como directora xeral de Promoción da Igualdade. Trátase de dous organismos de recente creación ao subdividir á antiga Secretaría Xeral de Igualdade.
Roberto Barba era na actualidade maxistrado do Xulgado de Violencia de Xénero número 1 da Coruña -posto que desempeñaba desde 2022- e ten unha dilatada carreira no eido xudicial desde 2007, pasando por xulgados de Betanzos, O Barco de Valdeorras ou Lugo. No 2015 foi nomeado maxistrado polo Consello Xeral do Poder Xudicial.
Pola súa banda, María Quintiana asume o cargo tras exercer durante os últimos seis anos tarefas de asesoría de comunicación na Presidencia da Xunta e coordinar as redes sociais. Licenciada en Xornalismo, conta cun mestrado en Dirección de Comunicación Corporativa.
Na toma de posesión estivo presente o presidente da Xunta e a conselleira de Política Social e Igualdade, Fabiola García, que destacou que coa creación destas dúas direccións xerais, Galicia convértese na única Comunidade de toda España en contar con áreas especializadas nestes dous ámbitos, o que significa redobrar os esforzos nesta materia. “Continuaremos a traballar para que Galicia sexa unha terra máis diversa, máis igualitaria e máis plural”, concluíu.
Tamén este martes foi a toma de posesión de Sandra Vázquez como directora xeral de Relacións Institucionais e Parlamentarias acto ao que asistiu o conselleiro de Presidencia, Xustiza e Deportes, Diego Calvo.
Sandra Vázquez naceu en 1986 en Vilalba (Lugo). É titulada en Administración e Dirección de Empresas pola Universidade de Santiago de Compostela (USC), máster en Finanzas e Seguros e xestora administrativa polo Colexio Profesional de Xestores Administrativos. Foi senadora pola provincia de Lugo desde as eleccións xerais de 2015 ata o 2016, sendo vogal da Comisión de Economía e Competitividade, voceira da Comisión de Igualdade e vogal da Comisión de Peticións. En 2016 foi elixida deputada autonómica por Lugo no Parlamento de Galicia. Foi tamén concelleira do Concello de Vilalba desde o ano 2015, ata que en xuño de 2023 foi nomeada secretaria xeral da Igualdade, cargo que ocupou ata o momento.
