A ensenada de Chapela

Mentres as remeiras de laranxa manteñan a motivación e a ilusión, non deixarán de caer Bandeiras no que queda de verán. Chapela non ten rival na Liga F e onte volveu amosalo en augas do seu propio municipio, pero non da súa parroquia. Alí, en Cesantes, as líderes transformaron a ensenada de San Simón na ensenada berete.

A superioridade volveu quedar clara cos case 20 segundos que Chapela acadou sobre Mugardos, a mellor traiñeira do resto. Despois veñen todas as demais, entre elas a de Cesantes. O bote flúor está a asinar unha moi boa campaña e onte finalizou no cuarto lugar tirando partido do sempre particular campo de regatas do fondo da Ría de Vigo.

Tan fantástica paraxe reuniu a un bo anaco de siareiros na praia da parroquia redondelana para animar a candanseu equipo. Por sorte -para os beretes- ou por desgraza -para o resto- a diferencia de nivel volveu ser demoledora. Se non acontece nada estrano, Chapela vai gañar todas as regatas da Liga Galega e será ó final do verán cando atope rivais á altura na tentativa de ascenso a ACT.

Cesantes repite regata hoxe, desta volta coa Liga A (17:00, TVG2). A Liga F, pola súa parte, viaxa a Castropol (17:00).

Por outra banda, a Liga B tamén celebrou regata onte. Foi no Grove, na Bandeira do concello grovense. Muros-Esteirana acadou a vitoria, con Mugardos-A Cabana en segundo lugar. Chapela B foi cuarta, posto que replica na xeral.