O mar é vermello de Cabo da Cruz. E non troca nin co ceo despexado, nin baixo a choiva, nin, de novo, cando as nubes afastáronse e abriu o día de volta. Así foi a mañá de remo no Memorial Paco Fenosa de Chapela, que tivo a participación de 36 traiñeiras e as catro categorías remataron con vitoria dos remeiros de Boiro. Por detrás, quedaron o resto de embarcacións, aínda que cun papel moi destacado para as tripulacións de Chapela, xa que todas tocaron o podio.
Os derradeiros barcos da regata remataron baixo o sol. Os raios caían sobre os remeiros mentres que lonxe, no horizonte, preparábase outro chuvasco, pero aínda tiña uns minutos para chegar. Nese contexto apertaba a tripulación de Chapela, que viña en tempos de loitar pola vitoria cos barcos da Liga ACT de Cabo da Cruz e Bueu. Trataban de acelerar os remeiros de Juan Zunzunegui. El, que estaba dentro do barco, ó igual que todos os compañeiros, metía os watios que podía, pero o esforzo chegou ata a seguna praza para rematar a cinco segundos do bote de Boiro, un bo resultado porque superou a Ares -tamén da Liga Galega-, que se deixou oito, pero non suficiente para levantar a bandeira. Unha mágoa para os locais tras un gran esforzo. Bueu foi terceiro (+5.17) e xa cederon máis as traiñeiras de Tirán Pereira, sétima e novena, que continúa sen definir o seu equipo principal, e Samertolameu, que rematou na oitava posición. Cesantes asinou a décimo terceira praza.
Media hora antes, o paseo de Cardona era gris, moi gris porque no momento de vogar as mulleres asomou entres as Cíes e O Morrazo o chuvasco forte da mañá. Caía auga e máis auga mentres as traiñeiras femininas avanzaban polo campo de regatas fronte ó paseo de Cardona, no que os paraugas protexían ós valentes que seguían a proba e no club de remo de Chapela permanencían resgardados remeiros e acompañantes que non levaron a protección contra a choiva. Todo apagado e gris, pero o vermello de Cabo da Cruz volveuse a impoñer e esta vez con claridade, mentres que a esperada loita entre Chapela, campioa da Liga Galega, e Tirán Pereira, da Euskotren, non chegou a darse porque as moañesas superaron en máis de vinte segundos ás da casa. De feito, Cesantes, cuarta a cinco segundos das beretes, quedou a pouco de dar unha notable sorpresa.
Chegaban á terra tiritando algunas das remeiras co frío tras papar a choiva e os veteranos saían da ducha. Eles tiveron un día moi distinto, con sol e algo de nubrado. A auga chegou ó recoller as traiñeiras. Diferencias no ambiental, pero no deportivo, o resultado foi igual: gañou Cabo da Cruz. Neste caso, por diante de Chapela e Samertolameu. Como tamén triunfaron en veteranas ó superar a Puebla.
