Cabo da Cruz recupera o mando

A tripulación de Cabo da Cruz regresou onte á vitoria na Bandeira Reganosa disputada en Mugardos en formato contrarreloxo tras unha espera de case unha hora. Os problemas no campo de regata obrigaron a optar polas saídas de un en un nunha cita con ata cinco ceavogas e na que as remeiras de Boiro amosaron unha notable superioridade sobre Chapela, segunda. Deste xeito, o barco de Redondela queda a un punto do bote do Barbanza na clasificación xeral.

A emoción foi escasa porque nas primeiras tres balizas Cabo da Cruz e Chapela mantiveron un ritmo constante. En cada longo, o barco líder ampliaba en dous segundos a renda sobre a “Arelonga”. Despois, no treito final, disparouse a distancia.

Por detrás, Tirán Pereira igualou a súa mellor actuación da tempada coa terceira praza ó superar a Perillo, que gañou o sábado pero onte pagou o desgaste. O barco moañés e o de Oleiros foron repetindo os tempos ata o último rego. Perillo tiña un segundo de renda, pero rematou mellor a “Ruly” para superar con claridade á súa rival.