Atlántico

TRAIÑEIRIÑAS

Cabo da Cruz manda

O club de Boiro acada tres podios en Moaña cunha vitoria e Samertolameu domina en xuvenís

Samertolameu acadou a vitoria na categoría xuvenil da Bandeira Concello de Moaña.
Samertolameu acadou a vitoria na categoría xuvenil da Bandeira Concello de Moaña.
Cabo da Cruz manda

Xornada marcada onte por un vento decrecente no campo de regatas da Mosqueira, na Bandeira Concello de Moaña, que dificultou o vogar das embarcacións femininas e xuvenís e, a continuación, condicionou a competición absoluta sénior, na que existiu un puco de xogo pola participación de Cabo da Cruz nesta proba.
O club de Boiro, que habitualmente compite no territorial norte, aproveitou o domingo para acudir ata a Ría de Vigo. Sen resultados previos, todas as súas traiñeiriñas tiñan que remar na quenda inicial. En sénior era o barco favorito porque esta tempada é o único club de Galicia con representación na Liga ACT. 
Coa súa participación, Tirán Pereira optou por inscribir a un barco máis para probar cunha tripulación forte no man a man co bote de Boiro na primeira tanda da xornada que, deste xeito, resultou dun extraordinario nivel, con vitoria para Cabo da Cruz e segudo posto para Tirán B. Serían o gañador e o terceiro na regata porque Bueu, xa dende a cuarta quenda do día e con algo menos de vento, meteuse entre eles. Samertolameu meteu ás súas traiñeiriñas na cuarta e na sexta praza. 
En mulleres, a regata estivo marcada polo duelo entre Riveira e Cabo da Cruz. A vitoria foi para as primeiras por escasas 35 centésimas. O podio completouno Tirán Pereira a máis de medio minuto da parella cabeceira. A bandeira recaiu en Riveira, xa que a sénior é a única categoría de mulleres. 
Na categoría xuvenil masculina, a vitoria recaiu en Samertolameu de Meira, que amosou de novo o seu gran nivel este ano. Superou en máis de nove segundos a Cabo da Cruz. O club boirense, con esta segunda praza e a vitoria en sénior de homes, levantou a Bandeira Concello de Moaña. 
A tempada de traiñeiriñas continúa este fin de semana con dúas novas citas. O sábado en Bueu e o domingo en Redondela, nunha proba organizada polo Círculo Cultural de Cesantes.n