O Kaleido Vigo colócase a un punto da permanencia tras gañar con comodidade ó Durango
O Kaleido Universidade de Vigo acadou onte a vitoria ante o Durango, pechacancelas da táboa, con moita claridade e sitúase a un punto das posicións de permanencia aínda que continúa no penúltimo posto, que obriga a xogar a promoción.
O enfrontamento de onte careceu de emoción porque a formación vasca amosou un nivel escaso e foi superada polos vigueses dende o primeiro minuto. Uru realizou o saque en longo para comezar o partido e o oval escorregouse entre as mans do receptor vasco. Chegou a melé, unhas cantas fases de dianteira e intercambio de posesións sen moverse do campo visitante ata que Tatafu levou por diante a un par de rivais para asinar o primeiro ensaio do partido.
Un resumo perfecto do que aconteceu despois porque o tongano sumou ata catro ensaios ante un opoñente con moita ilusión, pero tamén multitude de limitacións no seu xogo. O Durango, que suma quince derrotas, descenderá ó final de curso e o conxunto vigués loita por manter a categoría. Onte, a pesar das facilidades outorgadas polo rival, amosou algúns dos argumentos para a esperanza como a capacidade de Carlos de Cabo na zona de medio de melé para mover o oval ou a claridade de Uru no ataque para superar liñas e dar o pase ou a patada no momento exacto. A isto engádese un paquete solvente dende a chegada de Emilio Brizuela e certas garantías nos saques laterais.
Con estes argumentos e a eficacia de Tatafu nos últimos metros, o equipo dirixido por Adrián Lago superou a un Durango que facilitou o camiño local ó amosar unha defensa deficiente, pouca organización e falta de ritmo tanto na defensa como no ataque.
Ó descanso, o marcador sinalaba un claro 34-0, que deixaba o enfrontamento resolto e, na segunda metade, o Kaleido Vigo incluso aproveitou para sacar do campo a Tatafu e Javi Abadía, que tiveron minutos de descanso.
Na táboa clasificatoria, a formación universitaria ten o filial do Salvador a un punto e o segundo equipo do Quesos Entrepinares está a cinco. Son os equipos ós que tentará alcanzar.
Kaleido Universidade de Vigo:
Tito Prieto, Nicolás Gómez (Barbudo, min. 41), Emilio Brizuela, Carlos López, Javier Abadía (Oliveira, min. 65), Ignacio Villegas (Filgueira, min. 49), Agustín Bargiela, Falemaka Tatafu (Feijóo, min. 60), Carlos De Cabo, Koldo Barandiarán, Carlos Davila, Mauro González, Valentín Gutiérrez, Santiago Gutiérrez, Uru.
Durango Nissan:
Javier Marín(Torres, min. 43), Xabier Lázaro, Jokin Alberdi (Gorka Rodríguez, min. 54), Imanol Tera, Sabin Goiti (Edorta Aguirre, min. 55), Gorka Igartiburu (Iturrioz, min. 50), Harriet Cabezas, Antzón Iriondo, Inazio Azurmendi (Cristian Rodríguez, min. 41), Imanol Azurmendi, Aritz Iraeta, Iñigo Beitia, Liher Omarzabal (Aretxaga, min. 41), Ager Uribezubia, Aitor Lavilla (Alejandro Fernández, min. 41).
Anotacións:
7-0, min. 3: ensaio de Tatafu, que pasa Carlos Davila; 12-0, min. 7: ensaio de Carlos Davila; 17-0, min. 19: ensaio de Koldo Barandiarán; 24-0, min. 22: ensaio de Santi Gutiérrez, que pasa Carlos Davila; 29-0, min. 29: ensaio de Santi Gutiérrez; 34-0, min. 40: ensaio de Tatafu; 39-0, min. 46: ensaio de Tatafu; 44-0, min. 52: ensaio de Tatafu; 51-0, min. 67: ensaio de Valentín Gutiérrez, que pasa Carlos Davila; 51-5, min. 74: ensaio de Iñigo Beitia; 56-5, min. 77: ensaio de Santi Gutiérrez.
Árbitro:
Luis Santos. Sen cartóns.
