Deporte local
Baixo Miño polo mundo
Tardou corenta minutos o Mecalia Atlético Guardés en tomar a medida a un Rotweiss Thun voluntarioso, pero que afundiuse no treito final do partido. En todo caso, a formación do Baixo Miño deixa moi encamiñada a eliminatoria na Challenge Cup e o vindeiro domingo debe resolvela sen dificultade no pavillón da Sangriña (19:00).
Onte, o enfrontamento comezou cunha noticia especialmente fermosa antes do encontro ó atopar o equipo unha trintena de afeccionados do Baixo Miño nas bancadas do Sporthalle Gotthelf de Thun. Con este impulso saíron concentradas as xogadoras dirixidas por José Ignacio Prades e ós dez minutos o marcador establecía un 2-5, no que parecía o primeiro intento de rachar o partido. Eran minutos nos que funcionaba a primeira liña dirixida pola portuguesa Patricia Lima e completada por Sandra Santiago e Paulina Buforn. Unha importante novidade porque os problemas físicos de Carmen Campos impediron xogar á madrileña. Unha ausencia notable xa que, no que vai de tempada, foi a xogadora máis determinante na primeira liña por dirección e capacidade goleadora.
Si estivo no equipo Sarah Valero, que a pasada semana padeceu un forte golpe no xeonllo e, tras descartarse unha doenza grave, volveu ó equipo para aportar no centro da defensa e contribuír a parar o ataque do Thun.
Despois do inicio a gran velocidade, o Guardés perdeu o acerto. O ataque parou e tamén comezaron a chegar os goles da formación local. Pouco a pouco, o enfrontamento entrou nunha dinámica de igualdade e intentos guardeses por rachar o partido. Non chegaba e a formación helvética parecía estar cómoda no encontro. A isto engadiuse que a porteira Karmen Korenic estaba acertada e axudaba con boas intervencións ó seu equipo.
Ó descanso chegouse cunha renda curta para as xogadoras do Baixo Miño. Un 11-12, un marcador axustado e que deixaba todo aberto para o segundo tempo. O Guardés tiña que buscar trocar o ritmo para mudar o partido, mentres que a formación local parecía máis cómoda. O paso polos vestiarios non sentou ben ás xogadoras de Prades e dez minutos despois, chegou o momento que parecía o destino inexorable do encontro polo visto na pista. O Thun tiña a primeira renda ó seu favor do partido e o técnico do Guardés paraba o encontro. Un tempo morto que resultou decisivo.
A partir dese punto, o encontro vivido no Sporthalle Gotthelf sería totalmente diferente. O Mecalia Guardés axustou un pouco máis a defensa, o Thun incrementou o número de erros e Marisol Carratú elevou a aportación da portería de importante a decisiva. A estatística indica que as locais perderon catro balóns e Carratú parou outros catro, mentres o marcador pasaba dun 15-14 a un 15-23.
Unhas cifras que serían o final da resistencia helvética, do partido e, salvo un afundimento totalmente inesperado na Guarda o domingo, da eliminatoria. Quedaba por pechar o marcador ó remate dos sesenta minutos, que quedou en 17-25. E, despois sobre a pista, chegou o momento da felicidade e a celebración. Apareceron os cánticos, as carreiras e a ledicia de festexar unha vitoria na competición europea a case 2.000 quilómetros da Guarda, pero con camisolas e bufandas coñecidas na bancada.
Vitoria de Prelchi
Pola súa banda, o Granollers da viguesa Carmen Prelchi superou ó Minsk (34-29).
Rotweiss Thun SPL:
Nora Gerber, Laura Rotondo (6), Adriana Lehmann (2), Milena Kaeslin (2), Kira Zumstein (5), Sibylle Peronino, Lisa Gerber, Karmen Korenic, Emily Weinekötter, Sophie Strupler, Jana Vanessa Karlen, Noelle Frey, Emilia Eberhart (1), Michelle Schmied (1).
Mecalia Atl. Guardés:
Meriem Ezbida, África Sempere (2), Sandra Marqués (5), Martina Mazza (1), Carmen Campos, Lorena Pérez (3), Sara Bravo (2), Estefanía Descalzo, Paulina Pérez (7), Patrícia Lima (4), Cristina Barbosa, Rosario Urban (1), Sarah Valero, Carla Gómez e Marisol Carratú.
Parciales:
0-2, 2-5, 5-8, 6-8, 8-10, 11-12 (desc.), 12-13, 15-14, 15-16, 15-19, 15-22, 17-25.
Árbitros:
Edin Kulovic e Vedad Skaljic (BIH). Excluiron a Rotondo e Schmied por parte das locais e a Sempere, Urban e Gómez (2) polas visitantes.
Incidencias:
Sporthalle Gotthelf de Thun, uns 400 espectadores.
