Atlántico

IRIS MALVIDO CABEZA DA LISTA PROVINCIAL DE EN MAREA PARA O CONGRESO.

“A nosa prioridade está na saída sur e o corredor porque son necesarios para Vigo”

 Con tradición familiar no mundo da política, a viguesa Iris Malvido encabeza a lista provincial de En Marea para o Congreso, conllendo o testemuño a Alexandra Fernández, diposta a pór os intereses dos pontevedreses "en coñecemento" dos deputados da Cámara Baixa. 

Iris Malvido, candidata provincial de En Marea ao Congreso.
Iris Malvido, candidata provincial de En Marea ao Congreso.
“A nosa prioridade está na saída sur e o corredor porque son necesarios para Vigo”

Como está levando o tramo final da campaña?
Moi ben, moi arroupada e con moitísima enerxía. Estame sorprendendo que a xente está a respostar moi ben, sobre todo nunha situación de apatía política. 

Un dos seus principais plans é acabar coa precariedade laboral.
É un dos temas que mái preocupan aos pontevedreses e propoñemos, por un lado, a creación de maiorías sociais alternativas a nivel estatal que permitan a derrogación das reformas laborais e ademais sabemos que é necesario o investimento. Ter uns orzamentos que sexan dignos e que permitan o desenvolvemento económico da provincia a través da potenciación do Corredor Atlántico, rematar a saída sur de Vigo e a conexión de todos os portos, incluíndo os portos secos como a Plisan, que permitan o intercambio de mercadorías e potencien a industria. É fundamental acabar coas causas da precariedade e potenciar o tecido industrial para xerar postos de traballo de calidade.

Falan do Corredor Atlántico e a saída sur, desbotan a idea de loitar polo AVE por Cerdedo?
Temos unha aposta clara pola mellora das infraestruturas e pola vertebración do territorio pero a nosa prioridade é o Corredor Atlántico e a saída sur de Vigo. A conexión por Cerdedo non o é. Quen está apostando por ela, debería explicar por ese AVE e non se fai o mesmo polo Eixo Atlántico e a saída sur que son moito máis rendibles económicamente e máis necesarios hoxe en día e que por tanto entendemos que deben ser unha prioridade real na que os partidos temos que estar dacordo.

Amosan tamén a súa preocupación polo sector do mar.
É un dos piares da nosa economía. Un sector prioritario na provincia e sobre todo na comarca de Vigo. É básico e necesitamos potencialo. Agora mesmo somos conscientes da situación de malestar que se está a xerar no sector pola subida da cuota de autónomos que se deu a comezos de ano e entendemos que foi un erro. Había que escoitar aos diferentes traballadores. A través da escoita activa e a creación de mesas de negociación se tiña que buscar unha solución. Por outro lado, tamén está sobre a mesa a modificación da lei de costas. É necesario que a nivel estatal se teña coñecemento sobre cales son os nosos sectores productivos. É importante explicalo en Madrid para poder defender os nosos sectores e sacar adiante esas regulacións que sexan máis beneficiosas.

Vostede pódese convertir en diputada segundo as últimas enquisas.
Dende que comezou a campaña sempre dixen que de dous escanos ninguén me baixaba e vai ser así ata o domingo. As enquisas sinalan que ese último escano da provincia está entre En Marea e Ciudadanos e estou convencida de que En Marea vai ser o dique de contención de Ciudadanos.

Cre que pode prexudicalos a separación con Unidas Podemos na provincia?
O que prexudica é non ser coherente co que defendes. Nós cremos que a coherencia e ética son fundamentais. Teño a percepeción, ao falar coa xente afastada das organizacións políticas, de que En Marea se ve como o que é realmente: a segunda forza política de Galicia.

Que lle diría aos indecisos para que se confíen na súa formación?
É necesario que entre En Marea para parar a Ciudadanos. Tamén porque non renunciamos a conseguir melloras sociais para os pontevedreses. Quen considere que todo eso é imprescindible e quere ter unha voz forte en Madrid, debe apostar por En Marea. Non hai ningunha outra forza que aposte tan claramente, que vaia favorecer a gobernabilidade e garantindo uns orzamentos dignos para Galicia e para Pontevedra. Penso que  provincia está a ser moi esquecida nas decisións estratéxicas e nos orzamentos xerais do Estado. Temos que ser esa voz que poña as necesidades da xente enriba da mesa no Congreso dos Diputados. Ao final o desenvolvemento económico permitirá o desenvolvemento social. Sen o desenvolvemento da provincia, é moi difícil que lle poida ir ben ao resto de Galicia a nivel industrial. n