A ciencia espállase por Vigo: todas as actividades gratuítas da G-Night

A ciencia volve tomar as rúas de Vigo coa celebración da G-Night. A programación deste ano inclúe diferentes actividades de balde espalladas pola cidade que se desenvolverán o vindeiro 29 de setembro baixo o lema ‘Conciencias Creativas’.

A Noite Galega das Persoas investigadoras chega a súa terceira edición co mesmo obxectivo: dar a coñecer o traballo dos investigadores da UVigo. Ademais, antes desta cita, científicos e científicas da Universidade de Vigo están visitando centros escolares e institutos de Vigo, Pontevedra e Ourense para mostrar o seu labor entre a mocidade no marco da iniciativa 'Researchers at schools'.

Expo-feira científica e obradoiros no Berbés

O Berbés repite como epicentro da G-Night en Vigo. O edificio Redeiras, sede institucional da UVigo, acollerá a expo-feira, que estará aberta ao público entre as 17.00 e as 21.00 horas e contará con 19 postos científicos de temáticas diversas.

Ademais, haberá un espectáculo de danza titulado 'Medo azul: cambio climático e incerteza na xente do mar', do grupo Future Oceans Lab (CIM). Tamén terán lugar, no primeiro andar do edificio, dous obradoiros. 'Extractos de algas e cosmética' a cargo do grupo Biodesost do CINBIO mostrará cremas cosméticas ás que se incorporaron extractos de algas pardas e vermellas obtidos nos laboratorios da universidade. Para participar en 'Os textos antigos tamén falan sobre a vulnerabilidade' do grupo GEAAT cómpre inscribirse previamente. Neste obradoiro practicaranse tres escrituras da antigüidade: xeroglífica, micénica e latina.

O edificio Redeiras tamén acollerá desde as 18.15 horas tres conferencias sobre a desigual distribución de custos do cambio climático, a intelixencia artificial e os fenómenos climáticos extremos. Ademais, entre as 20.00 e as 20.45 horas o público poderá asistir a unha charla do CITMaga, na que o investigador Carlos Meniño Cotón ofrecerá un relatorio titulado 'Matemáticas para a ciencia e a vida: topoloxía, datos e os segredos de Pompeia'.

Na aula 2 de Redeiras proxectaranse algúnscapítulos da miniserie documental 'Desafíos do Océano: científicas ao mando', que forma parte dun proxecto do Campus do Mar liderado pola UVigo. Tamén se proxectará o documental 'Xakexi Xjuani: La memoria de una lengua', de Mauricio Sereno, así como varios episodios de 'La Universidad responde', unha serie de pílulas audiovisuais nas que persoal investigador da UVigo ofrece solucións a preguntas frecuentes desde unha perspectiva científica.

Paseos científicos pola Ría de Vigo

A programación da G-Night en Vigo inclúe tamén tres paseos científicos pola Ría a bordo da embarcación Inndaga do Centro de Investigación Mariña da Universidade de Vigo. Nesta actividade, para a que é necesario rexistrarse, unha ducia de persoas poderá coñecer as técnicas de mostraxe de sedimentos e caracterización de propiedades físicas da auga e do fondo mariño que emprega o persoal investigador do CIM. Os paseos duran unha hora e comezarán ás 15.00 horas, con saída desde o porto de Vigo.

Charlas no café Vitruvia

Completan as actividades desta edición as charlas no marco de 'Ciencia no Bar', que se realizarán no café Vitruvia. A entrada é libre ata completar o aforo, limitado a 40 persoas.

Entre as 21.00 e as 22.00 horas desenvolveranse dúas charlas, dirixidas especialmente a público adulto. Diana Valverde (CINBIO) e Paloma Morán (CIM), abordarán o impacto do sexo e o xénero sobre as enfermidades e Ana Larrañaga (Cintecx) falará sobre a ciencia de datos e o seu verdadeiro propósito.

A UVigo, coordinadora en Galicia do evento

A coordinación desta iniciativa en Galicia correspóndelle á Universidade de Vigo, que lidera un consorcio formado por unha ducia de socios, entre os que se atopan as universidades de Santiago de Compostela e A Coruña e organismos de investigación galegos. O evento desenvólvese simultaneamente en preto de 400 cidades europeas.