Baixo o título “Benvidos a Vigo Street”, o Galician Freaky Film Festival convoca a segunda edición do seu concurso de banda deseñada, buscando repetir a boa participación do ano pasado e ensalzar o formato cómic, habitual na cultura freak, que implica altas capacidades técnicas e creativas por parte dos autores.
O prazo de presentación de obras está aberto ata o 31 de xullo a través dun formulario dispoñible na web do Galician Freaky Film Festival.
Nesta segunda edición do concurso, a premisa de partida proposta polo GFFF é o filme “A Nightmare on Elm Street”. Estreado hai 40 anos e protagonizado por un dos personaxes máis carismáticos e recoñecibles do cinema de terror, Freddy Krueger, quen poboou os pesadelos de varias xeracións a base de asasinar adolescentes de xeitos cada vez máis tolos. Ademais de inspirar o concurso “A Nightmare on Elm Street” será proxectada na xornada de apertura festival, o 20 de setembro.
