Laura Torrado: "Queremos ampliar o noso catálogo con árabe e ruso, hai un interese real por esas linguas"

A Escola Oficial de Idiomas(EOI) de Vigo afronta un novo curso escolar coa ledicia de que pouco a pouco volven ás cifras de alumnado previas á pandemia. A súa directora, Laura Torrado, fala sobre os retos de presente e futuro do centro.

Como valora a matrícula en los diferentes cursos?

Durante o presente curso académico temos notado un novo incremento na matrícula que confirma a tendencia ascendente de recuperación de alumnado dos últimos cursos. En xeral, estamos moi satisfeitos con este aumento, que nace da diversificación da oferta educativa que temos aplicado dende 2020 e da boa reputación do noso profesorado, quen aplica técnicas moi innovadoras nas aulas e iso atrae a alumnado de xeito constante mediante o boca a boca.

Cantos alumnos estudan polo menos un idioma na EOI? Segue a tendencia doutros anos?

Durante o curso 2023-2024, para o cal a matrícula nos cursos monográficos e no programa That’s English aínda está aberta, contamos con aproximadamente 5.400 alumnos e alumnas entre a sede central e as sedes de Cangas, Coia, Nigrán, Ponteareas, Redondela e Tui. A estes habería que sumar tamén o alumnado que se matricule para as probas libres, cuxa preinscrición está actualmente aberta ata o 20 de outubro, dado que as probas terán lugar, por primeira vez, no mes de xaneiro.

Cal é a lingua máis demandada este ano? Hai algunha con demanda ascendente?

O alumnado que elixe a EOI ten motivacións diversas, como poden ser o recoñecemento oficial das nosas titulacións, a oferta de linguas que non son doadas de atopar, como o chinés ou xaponés, ou a ampla oferta horaria. Por isto, os perfís de alumnado son moi específicos en relación á lingua escollida, e ningunha destaca entre as demáis como “máis popular”. Con todo, temos notado que cada vez o alumnado agradece máis ter opcións de formación especializada, como son os cursos monográficos que ofrecemos en alemán, inglés e italiano, e os obradoiros de actividades diversas, coma o de podcast e radio, os de linguaxes específicas coma francés para o turismo ou inglés académico avanzado. Estas opcións formativas están tendo moito éxito e animánnos a aumentar a oferta de cara ao segundo cuatrimestre e ao vindeiro curso académico. Practicar unha destreza concreta, como a fala e a escritura, ou un aspecto específico, como a pronuncia, a través da radio, sen a presión do exame, empuxa ao alumnado a participar nestes cursos con moitos folgos.

Cal é o perfil medio do alumnado?

Unha das riquezas máis grandes de estudar nas EOI é a da oportunidade de asistir a clase con xente de moi diversos perfís e transfondos culturais. Esta heteroxeneidade fai das nosas aulas un lugar para a aprendizaxe continua, non soamente de lingua, senón tamén de aspectos relacionados coa traxectoria profesional do noso alumnado, as súas vivenzas e a súa orixe. Se tivese que xeralizar, diría que o noso alumnado pode aglutinarse en tres grandes grupos que conviven no centro: por unha banda, o alumnado post-adolescente ou na veintena, que estuda idiomas como un complemento á súa formación; o alumnado que xa ten unha traxectoria profesional establecida e acude ao centro como un xeito de manter o seu currículo competitivo, e, por último, o alumnado senior, que busca cumplir metas agora que teñen tempo e ganas. Nas aulas, estes grupos non actúan como entes estancos, senón que interactúan entre si, creando sinerxias de aprendizaxe verdaderamente interesantes.

Que novidades presenta a EOI de Vigo para este curso escolar?

No eido académico, este ano reforzamos o itinerario de ensino semipresencial, ampliando os cursos de inglés ás seccións de Coia, Redondela e Tui, e introducindo o alemán na sede central. O ensino semipresencial segue a ser unha modalidade moi demandada polo alumnado, dado que permite unha mellor conciliación da vida persoal e académica. Ademais, a gran vantaxe desta modalidade é que o alumnado ten o material ao seu dispor de balde e o profesorado está presente a través da plataforma para axudar en todo momento. Tamén aumentamos o número de cursos monográficos que se ofertan en inglés, francés e alemán, para quen non quere certificar o nivel ao final do curso. Finalmente, implantamos o nivel C2, o máis alto, en alemán, francés e italiano, que se suman ao galego, inglés e portugués que xa tiñamos e facilitan que o noso alumnado poida realizar toda a súa formación lingüística no mesmo centro.

Cantos alumnos suman as sedes que complementan á central?

En total, as seccións aportan arredor de 2000 alumnos á sede central, e todas ellas seguen o mesmo patrón de recuperación paulatina de alumnado despois da pandemia. A existencia destas seccións, ubicadas en centros de ensino secundario e con horario de tarde, permite ao alumnado non ter que desprazarse á sede central.

Ademais dos cursos ordinarios de idiomas, na EOI organizan máis actividades formativas e divulgativas. Hai alguhna novidade este ano?

Ata o momento, confirmamos que o programa de Bolsas do Concello de Vigo, que permite ao noso alumnado realizar estadías lingüísticas no estranxeiro, seguirá a súa andaina. Ademais, o centro acolle cursos de formación do profesorado a través do Centro de Formación e Recursos. Actualmente, estamos organizando os clubs de lectura en varias linguas (francés, galego e inglés) e preparando obradoiros que acheguen aspectos diversos da cultura ao alumnado, como pode ser a cociña, a música ou a caligrafía das linguas asiáticas.

Recentemente xurdiron numerosos métodos para aprender idiomas fóra das aulas. Cre que é posible aprender unha lingua, por exemplo, a través dunha app móbil?

Estamos a vivir una era de revolución tecnolóxica na que a irrupción da intelixencia artificial plantexa debates moi interesantes no ensino de linguas estranxeiras, mais a experiencia na escola parece suxerir que o alumnado emprega aplicacións móbiles e outros apoios tecnolóxicos cun papel secundario, de apoio ao proceso de aprendizaxe que viven nas aulas, en primeira persoa xunto aos docentes. A lingua é un ente vivo, orgánico e en constante evolución, co que considero improbable que se poida aprender unha lingua, con toda súa riqueza de matices, significados e connotacións, a través de medios tecnolóxicos exclusivamente. Sen retroalimentación e reforzo positivo real a aprendizaxe vese moi dificultada.

Planean engadir algún idioma más de cara ao futuro?

O ano pasado fixemos unha petición á Consellería para ampliar o noso itinerario formativo co árabe e o ruso, e pretendemos reiterala durante o presente curso académico xa que percibimos un interese real na nosa contorna por esas linguas.