Sen esconderse, por amor ó ataque e na procura da vitoria. O fútbol leva espectadores ó campo e gaña adeptos cando sobre un terreo de xogo atópanse equipos que saen a buscar a vitoria dende o primeiro minuto e a través do ataque, de propoñer fútbol e buscar ó rival en campo contrario. É unha proposta con dificultade porque obriga a ter talento e disciplina para crear e para buscar o balón o máis rápido posible tras perda.
De cando en vez, moi de cando en vez, sucede na Segunda División B que atópanse dous equipos destas características e onte en Barreiro sucedeu. O resultado foi un enfrontamento fermoso, con ocasións, con goles, con velocidade e con alternativas. O Melilla presentouse no campo vigués con toda a intención de mandar no partido e, dende o asubío inicial, presentou a presión na frontal do área do filial do Celta. Algo case extraordinario en Barreiro. Tanto, que os xogadores dirixidos por Jacobo e Marcos Montes padeceron dez minutos de desorientación absoluta. O Melilla tiña o balón, chegaba ó área rival e o recuperaba pronto. Unha situación pouco habitual, pero os célticos saíron dela con rapidez e da mellor forma posible. A partir do décimo minuto comezaron a elaborar e, pouco despois, fabricaron unha ocasión para rematar en gol.
A acción comezou na banda dereita coa presión sobre a saída do esférico. Saíu rebotado o balón en dirección a Losada co Melilla descolocado. O mediapunta gañouna por centímetros para habilitar a Yeboah con campo por diante. Controlou e puxo o centro rápido cara 'Manolito' Apeh. Dentro do área, o seu hábitat natural, deuse a volta e rematou ó fondo da rede mentres o defensa que tentou molestar saía rexeitado cara a portería.
Un disparo e un gol para o Celta B, o mellor argumento para o ataque constante do rival. O Melilla non tiña intención de renunciar a buscar as inmediacións de Fran Vieites e tivo as súas opcións de gol porque ten calidade no ataque co excéltico Hicham ou os mediapuntas Carri e Ramos. Así, o gardameta local tivo que sacar un remate de cabeza de Carlos Fernández e Ramos enviou alto un disparo dende a frontal.
No intercambio de ocasións chegou o segundo tanto vigués, nesta ocasión Moha salvou a presión dende o costado dereito para pasar o esférico de forma progresiva por Losada e Yeboah. O extremo chegou ó área e agora optou por un puntapé. Foi fermoso ó pau longo e o fondo da rede. O Celta tiña unha renda de dous goles en dúas accións de transición con espazo por diante. Carreira e calidade. Xusto o que case nunca pode existir en Barreiro porque os rivais adoitan acudir a pecharse.
O Melilla non o fixo e ía camiño de padecer unha derrota moito máis dura dos méritos acumulados, pero o árbitro entrou en acción para nun dos seus ataques con menos perigo observar un penalti por agarrón no área. Carri enviouno ó fondo da rede para reducir diferenzas ó descanso. En gran medida porque o porteiro visitante Alegada salvou cunha man extraordinaria un remate cruzado de Apeh. Tocou cos dedos e saíu rozando o pau.
O descanso sentou ben ó Celta B e non tanto ó Melilla. A formación visitante saíu ó terreo de xogo coa intención de equilibrar o marcador, pero o certo é que foron os xogadores de Jacobo Montes os que tiveron ata tres ocasións seguidas para pechar o encontro. No táctico deron un paso atrás, para gañar metros sobre os que cabalgar, especialmente con Apeh, en cada unha das saídas rápidas tras roubo na primeira liña de presión ou saída tras superar ó Melilla. No cincuenta chegou a primeira rotura con pase de Losada para o dianteiro, que recorreu medio campo e deixou a Yeboah, que enviou fóra o man a man. Cinco minuto despois o propio Apeh rematou no área tras regate e sacou o porteiro a unha man. Na terceira opción chegou nun saque de curruncho con remate do central Ross ó pau. Sacou Ceberio baixo paus e o puntapé posterior repeleuno Oleaga coa perna.
Tres accións claras para rematar co partido, pero errou o Celta B e chegou a inquedanza. Sen grandes ocasións, pero o Melilla vivía no campo vigués. Polo medio Apeh foi derribado no área de xeito claro, pero o colexiado Enrique Gao non quixo asubiar a pena máxima.
O empate estivo no pé do central Richi, que recolleu un saque de curruncho e marchou fóra por pouco. Xa eran minutos nos que a formación visitante vivía nas inmediacións de Fran Vieites, sen moito perigo, pero con saques e banda e de curruncho continuos ata que o Celta recuperou un balón, Dani Molina enviou un pase alto e longo para a carreira de Apeh con espazo, que superou por velocidade e por forza a Richi. Calmou o esférico e esperou á chegada de Losada. Control e gol do mediapunta para pechar o encontro. Asociación perfecta entre a forza do africano e a delicada calidade do xuvenil céltico.
Quedaba menos de un cuarto de hora por xogarse, pero o encontro estaba rematado. Aínda así, o Melilla continuou o seu plan de buscar o gol e vivir no área contraria e o Celta de aproveitar o espazo. Neste contexto Losada habilitou a Lauti para facer o cuarto no segundo remate tras enviar o primeiro ó pau. Despois aínda aconteceu unha pena máxima sobre Bermejo non sinalada e o segundo tanto visitante de Deco.
Celta B:
Fran Vieites; Carreira, Ros, Farrando, Pampín; Moha, Dani Molina, Yeboah (Jacobo, min 75), Losada, Bermejo y Apeh (Lauti, min 80).
Melilla:
Oleaga, Pepe, Richi (Héctor, min. 81), Diana, Mena, Ramos (Deco, min. 64), Carro, Ceberio, Hicham (Mawi, min. 75), Ruano, Carlos Fernández.
Goles:
1-0, min. 15: Apeh; 2-0, min. 25: Yeboah; 2-1, min. 35: Carri, de penalti; 3-1, min. 77: Losada; 4-1, min. 85: Lauti; 4-2, min. 94: Deco.
Árbitro:
Enrique Gao Aladro. Amosou cartón amarelo a Dani Molina, Losada e Jacobo polo Celta B e a Carlos Fernández, Hicham e Ceberio do Melilla.
Incidencias:
Partido disputado no campo de Barreiro ante uns 1.000 espectadores.
