A banda, disolta en 1998, volve a tocar en directo para homenaxear á poeta interpretando as cancións que escribíu
“Xela tiña una faceta da que non se está tratando, ela escribíu letras de cancións e nós démola a coñecer por toda España, onde Desertores vendeu perto de 25.000 copias”. Así, Valerio Araujo presenta o concerto que o vindeiro 15 de maio dará coa súa banda en Mondariz, ás 19:30 horas. Interpretará doce temas de Xela Arias, dez incluídos nos seus discos e dous, “El booguie” y “Nena alcohol”, aínda inéditos. “Son en castelán porque así o requería o panorama musical de entón, a comezos dos 90”, apunta o vogalista do único grupo que pode presumir de ter á poeta das Letras Galegas 2021 como letrista: “Xela formaba parte de Desertores e Desertores de Xela, eramos unha comunión perfecta”.
Araujo explica que Xela comezou a compoñer para o grupo porque xa era fan, “gustáballe o rock e escoitaba de todo, pero xa entón tiña un xeito moi particular de escribir, as súas cancións falan de amor e desamor cunha sensibilidade especial, non foi unha poeta ao uso que lle canta ás flores, ao sol e ás estrelas, as súas mensaxes dicían cousas como 'soy un puñal y la vida me va desangrando”. Lembra que o proceso creativo tiña o seu aquel, “ela pasábanos as letras para musicalas e para tentar asumilas, cando lle pedía unha aclaración para entendelas, nunca me daba unha explicación real, dicía que eran cousas persoais; sempre compredeu como tiña que ser a letra dunha canción, diferenciábaas moi ben dun poema; aínda que era doado musicalizalas, se había que cambiar unha palabra, dicíamosllo e non lle gustaba nada, daba mil voltas para poder encaixala”.
A primeira vez que Desertores tocou unha canción de Xela foi en 1987. Xúntanse despois de 23 anos para homenaxear a súa letrista. Valerio estará acompañado por Humberto Heredia, Juan Díaz, Paco Araujo e a incorporación de Pablo Garrido co saxo “que lle vai moi ben ás cancións de Xela”. Preparan un espectáculo coa interpretación de bloques de tres cancións, intercaladas pola declamación de poesía.
