ELECCIONES 12-J

O BNG negociará a gratuidade do tramo Vigo-Redondela da AP-9

Luís Bará e Alexandra Fernández, onte na Porta do Sol.
photo_camera Luís Bará e Alexandra Fernández, onte na Porta do Sol.

n n n “A partir do vindeiro 12 de xullo vai haber na Xunta de Galiza un goberno do BNG presidido por Ana Pontón que será un goberno aliado de Vigo e que traballará a favor de Vigo”, afirmou onte o cabeza de lista do Bloque pola provincia, Luís Bará, nunha visita realizada á Porta do Sol de Vigo. Acompañado polas tamén candidatas Alexandra Fernández e Carmela González, e mais o edil municipal Xabier P. Igrexas, Bará plantexou rematar cos once anos do Partido Popular, que calificou como “abandono”, e apostou por poñer en marcha un ‘Plan Vigo’ de investimentos e obras de mobilidade e infraestruturas.
Segundo explicou Bará, o BNG pretende activar a área metropolitana de Vigo como o grande motor de cooperación con todos os concellos da contorna para impulsar a área de influencia e a cidade. Para logralo desenvolverá un plan integral de mellora da mobilidade e das infraestruturas, “un Plan Vigo de investimentos en obras que son necesarias e que foron paralizadas polo Partido Popular”, abondou.
O “Plan Vigo”, segundo Bará, desenvolverase nos vindeiros anos en catro grandes ámbitos. O primeiro pasa polo fomento do ferrocarril, “que é a fórmula de mobilidade do futuro”, creando un ‘Galtren’ que dinamice o tren de proximidade para comunicar Vigo con Pontevedra, con Tui e co resto da comunidade. O segundo punto, dixo o nacionalista, céntrase no impulso do transporte público por estrada implementando o Plan de Transporte da Área Metropolitana, “paralizado ata agora polas liortas partidistas entre o PSOE e o PP”, e tamén mellorando as comunicacións da cidade de Vigo con dous polos de grande dinamismo como o Cuvi e Peinador. 
En terceiro lugar, Bará destacou a necesidade de impulsar o transporte marítimo de ría como unha alternativa sustentable para o tráfico a motor: “Haberá incentivos e tamén máis servizos dentro da ría de Vigo”, dixo. Por último, o cabeza de cartel destacou que o BNG desenvolverá dende a Xunta un plan de investimentos para mellorar a rede viaria con dúas actuacións que son clave, como a construción do túnel de ‘Julián Estévez’ para mellorar as comunicacións do barrio de Teis e tamén co campus da ETEA, e a urbanización da PO-330 en Pereiró, “unha obra tamén adiada polo desleixo da Xunta do Partido Popular”.

AP-9 gratuita en Redondela
Outro dos aspectos que Bará puxo sobre a mesa é que o goberno do BNG liderado por Ana Pontón “tamén será un goberno que impulse e negocie co goberno central actuacións que serán centrais para mellorar as comunicacións de Vigo coa área xeográfica e o resto de Galiza”. Nomeadamente citou o rescate da AP-9 e inmediatamente a gratuidade do treito entre Redondela e Vigo, así como a urbanización do tramo urbano que atravesa a parroquia de Teis.
Finalmente anunciou que o BNG tamén implantará un plan de mellora de transporte de mercadorías por ferrocarril conectando o Porto de Vigo e todos os nodos loxísticos da área coa rede do corredor Atlántico de mercadorías por ferrocarril.
“Se a veciñanza de Vigo que quere o país, que quere un cambio, vai votar o 12X e concentra o seu voto no BNG, que é a alternativa real a Feixóo”, reiterou Bará en Vigo. n

Te puede interesar