Nigrán

Pista de surf skate para a contorna da praia de Patos

Skate en Nigrán, unha práctica deportiva que medra.
photo_camera Skate en Nigrán, unha práctica deportiva que medra.
Aprobada pola Deputación Provincial unha axuda ao Concello de Nigrán por valor de preto de 40.000 euros

A Deputación de Pontevedra acaba de aprobar unha axuda ao Concello de Nigrán, por valor de preto de 40.000 euros, coa que poderá facer fronte á dotación dunha pista de surf skate que se instalará na contorna da praia de Patos. Estes recursos pertencen ao Plan Extraordinario de Infraestruturas Deportivas da Deputación, dotado de 4 millóns de euros para todos os concellos da provincia (59) con número de habitantes inferior a 50.000.

O Concello de Nigrán recibirá un total de 39.161,31 € para dotar a vila desta nova infraestrutura, que se situará na parcela que actualmente ocupa o aparcadoiro e o parque con bambáns. Poderá ser empregado por bicicletas, skates, scooters e rollers para a práctica destes deportes creando un espazo público de calidade que non modifique a contorna. A maioría das medidas dos elementos serán axeitados para todas as idades e niveis, pero con algúns obstáculos para practicantes de nivel máis avanzado que poderán empregar a medida que vaian ascendendo.

O obxectivo do surfskate é levar os movementos e as sensacións do surf ao asfalto, empregando un skate cuns eixes que simulan o movemento fluído dunha táboa de surf nunha onda. A pista estará deseñada en forma de anel pechado para o seu uso simultáneo por parte de varios usuarios, cun lado recto con curva de 2,4 e 7 metros e outro máis sinuoso con curvas de 2,4 e 2,4 metros, de carácter máis técnico. Toda a instalación construirase en asfalto e toda a zona de rodadura e mais as plataformas terán transicións curvas de xeito que os movementos sexan continuos e fluídos.

O Plan Extraordinario de Infraestruturas Deportivas da Deputación mobilizou ata o momento máis de 2,7 dos 4 millóns de euros do orzamento total, con achegas para Arbo, As Neves, Baiona, Cangas, A Cañiza e outras.

Te puede interesar