Atlántico

MEMORIAL QUINO SALVO

Sen triplas non hai paraíso

O Obradoiro perde ante o Alba Berlín tras mandar no primeiro tempo e amosarse errático no tiro tras o descanso
Czerapowicz (dorsal 35) trata de anotar unha canasta entre dous defensores do Alba Berlín no partido das Travesas.
Czerapowicz (dorsal 35) trata de anotar unha canasta entre dous defensores do Alba Berlín no partido das Travesas.
Sen triplas non hai paraíso

Baloncesto de pretempada, de cambios constantes, de movemento no banco, de trocos, de minutos para os menos habituais, das probas. O Memorial Quino Salvo viviu onte todos estes elementos e tamén un enfrontamento fermoso, non exento de calidade e con intensidade porque con Moncho Fernández e Aito García Reneses como adestradores é imposible a relaxación. 
O equipo santiagués saiu á pista cun equipo que podería ser titular na meirande dos partidos deste curso e no que estaban Calloway, Vasiliedis e Brodziansky. E o encontro comezou cunha tripla do grego, pero despois chegou o apagón compostelano e malos minutos, especialmente en defensa, que obrigaron a pedir tempo morto a Moncho Fernández co 3-10 e, cando o encontro comezou a endereitarse, a mover o banco buscando intensidade para recobrar o mando do partido. Axudou o traballo santiagués na súa zona e tamén a retirada do equipo inicial do Alba Berlín pola segunda unidade. 
O equipo de Santiago xa estaba lanzado e axudouno a retirada dos mellores homes visitantes e, especialmente, a saída do campo do pivote Nnoko por Nikic, que errou dous tiros a un metro do aro. Un par de tiros libres de Spires puxeron ó Obradoiro por diante no marcador antes de chegarse ó final do primeiro cuarto (18-17).
O segundo parcial serviu para amosar un pouco máis as constantes vitais do xogo do Obradoiro deste ano. Moncho Fernández vaise apoiar nas rotacións, na intensidade defensiva e onte probou o límite dos seus xogadores e, de feito, Vasilieadis e Calloway estiveron moito tempo no banco mentres o resto do equipo trocaba as posicións, especialmente na zona exterior porque o conxunto santiagués do presente curso vaia a depender e moito do tiro de tres. Errou triplas ó comezo do segundo cuarto e, coa habitual intensidade defensiva, escapou no marcador cando entraron nos minutos previos ó descanso ante un Alba Berlín completamente atascado ata o intermerdio (33-24). Neste punto, os de Moncho Fernández acumulaban 23 lanzamentos dende máis alá do 6,75 por 8 de dous puntos. 

O terror santiagués
O descanso sentou ben ó Alba Berlín e moi mal ó Mombus Obradoiro, que volveron ó plan inicial pero a defensa comezou a sufrir con Makai e Hermannsson na dirección alemá. Moito 'pick and roll' frontal para aproveitar a súa velocidade no desequilibrio e os centrímetros de Nnoko nas continuacións e no poste baixo. Sen un defensor forte na formación de Moncho Fernández, o Alba Berlín comezou a anotar con máis facilidade e cando o Obradoiro volveu ó plan inicial das triplas, deixaron de entrar. Dúas de Calloway mantiveron o parcial, pero despois enviou dous pases pola liña de fondo e errou dende 6,75 Vasilieadis –que marchou ó banco e non volveu á pista–, tamén Pozas e Fletcher Magee por partida dobre. A isto engadiuse que a formación alemá limitou as rotacións e, por momentos, recordou que tamén sabía anotar dende lonxe. 43-52 ó final do terceiro cuarto. 
O último parcial foi un intento continúo do Obradoiro por meterse no encontro ante un Alba Berlín que xa coñecía o camiño cara a vitoria. Continuou no camiño marcado e calquera esperanza de vivir un final emoción marchou no tiro de tres santiagués. Catro convertidos e trece errados tras o descanso.

Monbus Obradoiro (18+15+10+15): 
Calloway (11), Czerapowicz, Vasileiadis (3), Brodziansky (6), De Zeeuw (6) –cinco inicial–  Spires (13), Fletcher Magee (3), David Navarro (6), Daum (7), Muñoz, Pozas (3). 
Alba Berlín (17+7+28+16): 
Hermannsson (7), Schneider (11), Eriksson (10), Cavanaugh (2), Nnoko (21) –cinco inicial–, Mason (10), Delow (5), Mattisseck, Brenneke, Nikic, Sikma (2).
Árbitros:
Pérez Pérez, Cortés Rey y Rial Barreiro. Eliminaron por cinco faltas persoais a Spires, do Obradoiro. Sen eliminacións no Alba Berlín.
Incidencias:
Partido correspondente á terceira edición do Memorial Quino Salvo de baloncesto disputado no Central das Travesas. Aproximadamente 1.500 personas nas bancadas.