Día esperado, un dos máis esperados do ano para a familia do centro escolar Frián-Teis. E non é algo académico nin festivo. Aínda que ten parte de celebración porque o cross escolar é unha particular festividade deportiva, que onte bateu o seu récord de participación con case 400 corredores polos arredores do centro educativo vigués.
A xornada comezou á carreira, seguiu con velocidade e rematou algo máis lenta, simplemente, porque todo concluíu con cerimonias de podio. A tradición dunha boa competición de atletismo, aínda que, en todo caso, a cita tiña un carácter claramente popular e o posto, especialmente entre os máis pequenos, era o menos importante.
Ó récord da proba contribuíron os alumnos e pais do centro escolar Frián, que superaron o seu teito de anotados, e tamén os deportistas procedentes doutros centros escolares, que tamén acudiron de forma masiva a unha cita que tivo o sol como acompañante. Correron moito os cativos e tamén os pais porque outra das características de 2023 foi que a organización tivo que facer ata catro carreiras de pais debido á alta demanda. O deporte tamén é unha cuestión familiar.
O alcalde de Vigo, Abel Caballero, non fallou á cita para animar ós cativos e colocarlles a medalla conmemorativa, que foi para todos os participantes, independentemente da súa velocidade. Unha pequena recompensa ó esforzo.
