Vitoria do Choco coa firma dun futbolista da casa. O dianteiro canteirán David Martínez 'Davicín', que en tempadas anteriores xa tiña amosado a súa calidade pero atravesou lesións que o lastraron, realizou onte a súa presentación para a actual tempada na Terceira División e formalizou a candidatura a converterse nun auténtico xogador de referencia coa elástica do equipo de Redondela. Anotou os dous goles na remontada do equipo de Gonza Fernández ante un reforzado Rápido de Bouzas, que xoga baixo a batuta de David de Dios.
O primeiro tanto foi visitante por medio de Rubén Martínez, que aproveitou un rexeite tras unha falta para enviar o esférico á rede. Non foi ata o segundo acto cando Davicín anotou os seus tantos. O primeiro, tras aproveitar o rexeite dunha pena máxima errada por Félix, e o segundo, cun forte e preciso puntapé a cinco minutos para o final.
Aínda tivo tempo o Rápido para empatar e gozou dun penalti a favor. Non obstante, apareceu o cancerbeiro local e institución do Choco. Cortegoso, capitán do equipo, sacou o balón a Óscar Fondevila para deixar os puntos na casa.
Choco:
Cortegoso, Mario García, Samu Santos, Elias Reyes, Yago Vázquez, Iano Simao (Yerai Couñago, min. 81), Alberto Suárez, Rancaño (Comis, min. 51), Félix (Óscar Gil, min. 67), Martín Rafael, David Martínez 'Davicín'.
Rápido de Bouzas:
Álex Vila, Juan Barbeito (Miguel Fernández, min. 72), Alberto Rey, Aram, Iago Martínez, Lede (Areal, min. 67), Jesús Barbeito, Álex Rey, Carlos Pereira (Óscar Fondevila, min. 72), Rubén Martínez, Adrián Rodríguez (Jorge Maceira, min. 76).
Goles:
0-1, min. 12: Rubén Martínez; 1-1, min. 60: Davicín; 2-1, min. 85: Davicín.
Árbitro:
Daniel García Lesta. Amosou cartón amarelo a Mario García, Alberto Suárez, Yago Vázquez, Comis e Elias polo Choco e a Rubén Martínez, Aram Pazos e Álex Vila polo Rápido de Bouzas.
