¿Dónde estoy?  > Vigo

Palabras, frases e textos que desfilan polas pantallas dos ordenadores, as televisións, os carteis informativos de aeroportos e estacións, os vídeos musicais e os créditos das películas protagonizan unha exposición que desde hoxe e até 1 de abril de 2012 acollerá a Fundación Barrié en Vigo.

Trátase de 'Type in Motion', unha mostra artística sobre a preponderancia da tipografía dinámica na publicidade, os medios de comunicación, Internet, o deseño gráfico e incluso a vida cotiá, composta por máis dun centenar de obras do Museo do Deseño de Zúric que a Barrié trae por primeira vez a España.

A exposición, que está dividida en diferentes espazos temáticos: videoclips, curtametraxes, anuncios, gráficos animados, espazo público e longametraxes, fai un repaso a esta forma de expresión, desde os seus precursores até as últimas tendencias.

Entre as instalacións figuran 'Subterrain Hosesick Blues', presentación da xira de Bob Dylan de 1967 en que o cantante mostra uns carteis coa letra da canción que soa de fondo, así como traballos máis recentes como o vídeo 'The Child', en que as personaxes, obxectos e edificios están feitos con palabras.

No apartado cinematográfico destacan 'Catch Me If You Can', de Martin Scorsese e protagonizada por Leonardo di Caprio, polo uso dos créditos como resumo da película, e a entrada de 'North by Northwest', de Hitchcock, onde as letras se reflicten nos espellos dun edificio do que parte a trama.

A mostra recolle o gran formato, como as pantallas instaladas na sede da Novartis en Basilea onde se proxectan referencias literarias a modo de titulares de prensa, ou as tarxetas de felicitación animadas de Philip Apeloig ou a aplicación web de Issey Miyake, onde as modelos dun desfile deveñen en palabras.

O comisario da mostra, Andres Jansen, explica á EFE que a sociedade está 'rodeada' de textos en movemento que aparecen en pantallas de grande e pequeno formato, como as do portátil ou o teléfono móbil, e que a idea é facer unha aproximación aos diferentes usos que se fan deste 'novo fenómeno'.