O actor vigués Antonio Durán, máis coñecido por Morris, é dende esta fin de semana o novo presidente da Asociación de Actores e Actrices de Galicia. Afronta unha nova etapa nun momento crítico.
Que lle levou a se presentar como candidato?
Eu xa estaba na directiva e foi un relevo natural. Vicente de Souza xa cumpríu dous mandatos (catro anos) e está canso. Convencéronme; é algo que nos ten que ir tocando a todos.
Entón, van manter unha liña continuista?
É unha mala época. Tomaremos decisións consensuadas, pequenas cousas que aseguren manter os pactos coas administracións, xa que coa crise peligran moitos contratos. Temos que miralo todo con lupa, Por outra banda, hai que organizar actividades que den dinamismo á asoaciación e folgos neste momento delicado. En breve convocaremos unha asamblea extraordinaria para modificar os estatutos e nomear vicepresidenta.
Como lle afecta á crise ao colectivo de actores?
É un momento perigoso para a profesión: A Asociación Galega de Industrias Culturais (Agadic) conta este ano con 2.500 euros menos de orzamento polo que a Rede de Teatros pode perigar. En canto a televisión, hai menos cartos para produccións, polo tanto menos traballo. Ademais incide na calidade, e nós somos os que poñemos a cara. O noso obxectivo é asegurar o nivel actual de implicación das administracións. O teatro e o cine son cultura que nos identifica e que nos define como país. Temos que conservalo por riba de todo.
Licencia Creative Commons