A Policía Nacional detivo na Coruña un mozo cordobés, de 20 anos, acusado de estafa, usurpación de identidade e roubo de vehículos, delitos que supostamente cometeu por toda España tras iniciar relacións con homes aos que lles roubaba a documentación tras gañarse a súa confianza.
Fontes policiais informaron hoxe de que o 20 de febreiro se recibiu información sobre unha denuncia presentada por un home na que se dicía que o seu documento de identidade e tarxetas foran utilizados ilegalmente para pagar os gastos nun hotel na capital coruñesa.
A investigación determinou que nun hotel de gran luxo da Coruña estaba hospedado un mozo coa identidade da persoa que presentara a denuncia.
No devandito hotel tivo lugar a detención do mozo cordobés, que reservara un cuarto para varios días con identidade falsa.
O detido contactaba coas súas vítimas, sempre homes, a través das redes sociais, internet ou en locais de ambiente homosexual.
Con eles comezaba unha relación máis ou menos duradeira ata que conseguía facerse coa súa confianza para lograr a información bancaria que necesitaba e posteriormente desaparecía cos seus documentos de identidade e de conducir, tarxetas bancarias e incluso os coches, cando lles subtraía as chaves e inmediatamente cambiaba de localidade.
Noutros casos, se o devandito encontro se producía no domicilio da vítima, unha vez logrado o encontro sexual, aproveitando un descoido, simplemente desaparecía, e levaba o que podía.
Os documentos e tarxetas subtraídos utilizábaos para hospedarse en hoteis de luxo, contratar liñas de telefonía móbil, incluíndo a compra de teléfonos de alta gama e outros gastos de liquidez.
Segundo a Policía, o detido, un mozo 'simpático e moi ben parecido', conta cun amplo historial de denuncias, xa que o feito de hospedarse con identidades falsas en todos os casos, dificultou excesivamente a súa detención, polo que a investigación foi moi laboriosa.
A súa actividade esténdese practicamente por todo o territorio nacional e constan denuncias en Barcelona, Madrid, Valencia, Salamanca, Badaxoz, Cáceres, Mérida, Zaragoza, Murcia, San Sebastián, Ourense, Vigo, Pontevedra e A Coruña, onde finalmente foi detido.
Ademais, ten 25 antecedentes policiais por delitos relacionados coa propiedade, estafa, falsidade documental e roubo con forza entre 2007 e 2012.
Despois de pasar a disposición do Xulgado de Instrución número 8 da Coruña foi decretado o seu ingreso en prisión.
