O Concello de Pontevedra promove unha inusual campaña contra a violencia machista ao colocar estas provocadoras mensaxes en paneis na rúa para facer ver que a agresión física vai precedida da verbal
"Puta", "burra" ou "porca" son vocábulos humillantes que forman parte dunha inusual campaña contra a violencia machista que promove o Concello de Pontevedra ao colocar estas provocadoras mensaxes en paneis na rúa para facer ver que a agresión física vai precedida da verbal.
O plácido paseante arríscase esta semana ao sobresalto ante estes carteis, máis de corenta, e con todas estas expresións en maiúsculas e impresas sobre o rostro dunha muller.
O sobresalto é o efecto buscado. Ao se achegar aos rótulos, o peón descubre que tales comunicacións son unha chamada de atención contra o terrorismo de xénero, e, en concreto, contra o insulto que precede sempre o golpe.
"Ti cala que disto non sabes, burra", "Vas vestida como unha puta" e "Mira como tes a casa, porca" son as tres lendas principais, seguidas da advertencia de que "a violencia machista non empeza por unha malleira. Páraa antes".
Tamén se incorpora un número de teléfono gratuíto, e todo iso intégrase nunha campaña do Concello pontevedrés con motivo do Día Internacional contra a Violencia Machista, que se celebra no día 25 de novembro.
"Buscamos unha reacción incómoda ante unha situación que este ano está sendo gravísima, con moitas máis mortes de mulleres e un inmenso retroceso no camiño andado estes anos", sinala á EFE a concelleira de Igualdade, Carmen Fouces, que saúda a reacción "potente" dos veciños ante estas notas, as cales asumiu o Concello porque "os centros comerciais non as ían colgar".
"Hai que remover as conciencias e que se vexa o que hai detrás dunha morte", indica a edil, quen subliña que as frases que preceden o insulto "se encadran ás veces na 'cordialidade' e nas 'bromas' que as mulleres teñen que soportar", algo horrible.
O recibimento da campaña está a ser positivo, até o punto de que a Concellaría está a pensar en organizar un concurso para que os cidadáns detecten que palabra está escrita incorrectamente.
"A xente debe ler, comprobar, debater, falar do que está pasando", engade Fouces, que indica que a iniciativa continuará coa repartición de cartóns polo centro da cidade aos viandantes na rúa.
Diso encargaranse as alumnas dun ciclo de Formación Profesional de atención á dependencia, cuxa titora propuxo a colaboración ao grupo de goberno, á fronte do que está o BNG co alcalde Miguel Anxo Fernández Lores.
Estas exhibicións únense ás actividades organizadas polo Concello sobre este problema, ante o que os tres grupos da corporación municipal (BNG, PSOE e PP) acordaron unha declaración conxunta de condena á violencia contra as vítimas, así como o apoio ás mulleres e o compromiso de desenvolver políticas activas de prevención.
O fin último: condenar e rexeitar as actitudes machistas que danan calquera.
