Un total de nove centros escolares participarán na primeira fase deste proxecto piloto que ten como obxectivo a mellora da calidade educativa mediante a atención á diversidade do alumnado. Os contidos van dirixidos a docentes de Primaria, Secundaria e Bacharelato.
O conselleiro de Cultura, Educación e Ordenación Universitaria, Román Rodríguez; o presidente da Fundación Barrié, José María Arias Mosquera; e o reitor da Universidade de Santiago de Compostela, Juan Viaño; asinaron dous convenios con motivo da posta en marcha de Piteas; un programa de formación e mentoring para o desenvolvemento do talento nas aulas. Este programa, en cuxa primeira fase piloto participan nove centros escolares galegos, inclúe iniciativas de formación do profesorado para a optimización da detección e do desenvolvemento do talento nas aulas, así como accións directas de fomento da creatividade e as ciencias entre o alumnado.
PITEAS é un programa educativo impulsado pola Fundación Barrié que se centra no desenvolvemento das fortalezas e talentos dos estudantes, para o cal se teñen en conta as súas diferentes características, necesidades, intereses e motivacións. O obxectivo último é ofrecer ideas e ferramentas científicas e pedagóxicas que potencien o traballo colaborativo, as metodoloxías activas e o desenvolvemento do talento persoal e colectivo.
Dado que a formación do profesorado é un dos puntais desta iniciativa, a Consellería de Cultura e Educación participa no proxecto a través do Centro de Formación do Profesorado (CAFI) e dos distintos centros de Formación e Recursos (CFR) así como do profesorado especialista. Para tal fin constituirase un equipo base interdisciplinario con persoal destas entidades, que será o responsable da formación, mentorización, seguimento, tutorización e asesoramento dos centros participantes no programa. Así mesmo, o CAFI incluirá na nova plataforma de teleformación galega (platega) os distintos recursos correspondentes ao programa PITEAS. Pola súa banda, a Fundación Barrié –a través da súa Área de Educación– encárgase de desenvolver ese proceso de formación, proporcionará a metodoloxía, os recursos educativos, a tutorización e o seguimento e avaliación do proxecto, desenvolverá o proceso de formación e asumirá os custes da implantación do Piteas.
Implantación
A implementación do programa PITEAS nas aulas comeza en setembro co curso escolar 2016/17 aínda que a formación a profesores xa comezou con obradoiros e conferencias que teñen lugar na sede da Fundación Barrié en Vigo. O programa estrutúrase en catro anos, dos cales tres son de implantación e un de consolidación nos nove centros piloto seleccionados para tal fin entre a Consellería e a propia Fundación. No primeiro ano, a través do equipo de expertos creado a tal efecto, a Fundación Barrié formará a un grupo de profesores e aos coordinadores dos centros participantes. No segundo e terceiro ano, a través dos grupos de traballo creados a tal efecto en cada centro, os docentes formados inicialmente compartirán a aplicación con outros profesores. E xa no cuarto e último ano, cada centro, implicando á totalidade do profesorado, aplicará o programa de xeito intensivo.
Os centros que participan nesta primeira fase piloto serán na provincia da Coruña o CEIP Ramón Otero Pedrayo (A Laracha), o CPR A grande Obra de Atocha (A Coruña) e o IES Arcebispo Xelmirez II e o CPR Plurilingüe A Inmaculada (ambos en Santiago); en Ourense o CEIP Ben-Cho-Shey (Pereiro de Aguiar); e na provincia de Pontevedra o CEIP Carballal (Marín), o IES A Xunqueira II (Pontevedra), o CEE de Panxón (Nigrán) e o CPR Eduardo Pondal (Cangas).
Este programa débelle o seu nome a Piteas, un navegante, explorador e científico grego do século IV a. C., a quen se atribúen importantes descubrimentos, entre eles, que Hispania era unha península. Piteas soubo unir ciencia, esforzo e talento para construír unha nova mirada sobre o mundo que lle rodeaba, unha idea que a Fundación Barrié retoma como metáfora do seu compromiso educativo.
