Samertolameu foi segunda, Coruxo oitava e a barco local de Chapela pechou a regata
Xornada de vento na Ría de Vigo que lastrou ás embarcacións da quenda de honra da xornada e que sopraba máis na zona exterior do campo de regatas de Chapela, lonxe do abrigo do monte da Guía. Neste carreiro vogou Coruxo e caeu ata a oitava posición ó ser adiantada por catro embarcacións de mangas anteriores.
O día comezou con calma na Ría de Vigo, o que lastra ós barcos das balizas interiores por cuestión de calada. Non obstante, a partir da segunda quenda comezou a soprar a brisa mariña e muda completamente a situación porque pasan a ser as balizas exteriores, sen o abrigo do monte da Guía as lentas, lastradas polo vento e pola onda que entra sen oposición polo centro da Ría de Vigo.
Antes de comezar o movemento forte do aire, Chapela realizou unha mala regata na quenda inicial da xornada para pechar a clasificación ante o seu público. Incluso foi superada por Perillo, pechacancelas da Liga Galega A, que vogou pola rúa exterior con máis auga.
Na segunda manga do día comezou a soprar a brisa, pero aínda de forma lixeira, sen chegar a formar grandes ondas, pero suficientes para comezar a lastrar a baliza exterior. De ser o mellor rego, a converterse no peor.
Por alí vogou Castropol, que asinou unha actuación pobre, mentres que Amegrove, Bueu e Vilaxoán aproveitaron as circunstancias. A traiñeira grovense tivo un día especialmente inspirado para asinar a terceira posición da mañá. Un gran resultado. Pola súa banda, Bueu e Vilaxoán aproveitaron a cita para meterse por diante de Coruxo, que careceu da inspiración do día anterior e pagou o cuarto carreiro.
Cando deuse a saída a quenda de honra, o vento xa era forte e as ondas molestaban as traiñeiras das balizas exteriores. Pagouno a "Fontaíña", que chegou a seis segundos de Mecos-Mondariz, pero entre elas metéronse ata tres traiñeiras de quendas anteriores.
Na loita pola vitoria, Puebla gañou a Bandeira Concello de Redondela con oito segundos de renda sobre Samertolameu. Dani Pérez introduciu varios trocos na "Terca" tras gañar o sábado en Vilagarcía e o barco baixou algo o rendemento. Aínda así, lidera a táboa.
Nova vitoria de Mecos
Na competición feminina, Mecos gañou con claridade e Chapela foi cuarta por centésimas ante A Cabana. Mal día das locais.n
