terceira división

O pé do xigante no desconto

Tomás, que tenta controlar o esférico, anotou o segundo gol do Rápido no encontro de onte.
photo_camera Tomás, que tenta controlar o esférico, anotou o segundo gol do Rápido no encontro de onte.

O dianteiro do Rápido Tomás aproveitou un libre indirecto no tempo engadido para empatar o enfrontamento

Ata agora, malas sensacións. Son as sensacións que transmite o Rápido de Bouzas no inicio de tempada no que soamente leva un punto en dous encontros e onte logrouno no tempo engadido e coa inestimable colaboración do Sanxenxo. 
Alfonso cedeu a Vila co pé e o porteiro recolleu o esférico coas mans. Fernández Rodríguez sinalou o libre indirecto e o equipo local tivo acerto na execución. O alto Tomás apareceu nesta ocasión para conectar o disparo na xogada ensaiada e establecer a igualada a dous tantos que serve para estrear o casilleiro de puntos do conxunto de Bouzas. 
O partido comezou do mellor xeito posible para o equipo vigués porque Diego Diz anotou o primeiro tanto do encontro no terceiro minuto de xogo. Os xogadores de Jorge Otero parecían dispoñer de un día acertado e, nos dez primeiros minutos, chegaron en varias ocasións máis ás inmediacións de Vila.
Non obstante, a ledicia e o bo xogo foron dúas circunstancias efémeras. O Rápido encaixou o empate ó cuarto de hora de xogo por medio de Ramón, que bateu a Ferré. Dez minutos máis tarde, de novo o atacante do Sanxenxo superou ó porteiro local e deu a volta a un partido que se puxo complicado para o Rápido de Bouzas en cuestión de minutos.
Coa vantaxe visitante o enfrontamento chegou ó tempo de lecer e, tralo mesmo, o Sanxenxo optou por defender e tratar de utilizar tódalas artimañas posibles para parar o xogo e os intentos do equipo de Jorge Otero. 
En moitos momentos logrouno ante a desesperación do Rápido, que experimentou con variantes tácticas para sorprender ó seu rival. Non obstante, a igualada chegou no tempo engadido e debido a un erro do equipo visitante. 
O Rápido de Bouzas, que disputou o dous primeiros encontros do curso na casa, suma un único punto. Escasa bagaxe, pero aínda queda tempo para mellorar as prestacións.

Rápido de Bouzas: 
Ferre, Portas, Pablo García, David Castro, Sestelo, Sergio Santos, Iago Paz (Carlos, min. 61), Chema (Gabi Misa, min. 55), Tomás, Diego Díz e Miki (Oki, min. 71).
Xuventú Sanxenxo: 
Vila, Peña, Suso Martínez, Guille, Caneda (Diego González, min. 12), Alfonso, Héctor, Vidal, Cuchi (Walter, min. 91), Ramón y Jonathan.
Goles:
1-0, min. 3: Diz; 1-1, min. 14: Ramón; 1-2, min. 25: Ramón; 2-2, min. 93: Tomás.
Árbitro:
Expulsou a Sergio Santos polo Rápido de Bouzas (min. 94). Amosou cartón amarelo a Pablo García, David Castro, Diez e Sestelo polo Rápido e a Héctor e Ramón polo Xuventú Sanxenxo.
Incidencias:
Partido correspondente a segunda xornada disputado no Baltasar Pujales. 

Te puede interesar