O rival son eu mesmo

O Kaleido Vigo Rugby fixo onte case todo o necesario para gañar o partido de rivalidade ante o CRAT, o problema é que tamén fixo o preciso para perder e así foi como rematou o partido, con derrota por tres puntos ante un equipo que soamente se puxo por diante nos últimos tres minutos de enfrontamento e tras anotar dous ensaios que, sen quitarlle mérito, foron máis agasallos de Nadal adiantados dos locais que mérito do ataque coruñés. 
Situacións do deporte e problemas de equipo en apuros. O Vigo Rugby está preto das posicións de descenso e promoción. É antepenúltimo e está nesa situacións por partidos como o de onte que, no seu campo, con moito a favor, perde un encontro que tiña que gañar ou, de perder, que o gañe o rival. Tamén é certo que esa mala fortuna que sempre afecta ós pequenos tivo a súa importancia onte. O árbitro anulou un ensaio tras, supostamente, pisar a liña lateral e que un golpe de castigo de Carlos Davila pegou no pau transversal e regresou ó campo. Serían sete ou nove puntos... A vitoria.
O encontro rematou con derrota tras iniciarse o partido con ensaio de Maka Tatafu e a conversión posterior. A partir de aí, o enfrontamento entrou nunha fase de moito proxecto de ataque e erros continuos. As defensas gañaban os intentos de rachar ó rival, especialmente na liña de tres cuartos, onde nin coruñeses nin vigueses tiñan acerto. De feito, o que amosaban eran uns terribles problemas para superar liñas, incluso en superioridade numérica.
Neste contexto de partido, os puntos chegaron ó pé e ó descanso, o marcador sinalou un 13-6. Algo de inexperiencia e escasa capacidade para anotar.
Ante o partido pechado, o CRAT apostou por introducir no campo ós irmáns Negreira para tentar gañar empurre no xogo de contacto e tratar de crear problemas a un Kaleido Universidade que, coa chegada de Brizuela ó piar pechado, estabilizou a melé e gañou limpeza nos agrupamentos. 
O partido mantívose pechado, igual en exceso para un Kaleido Universidade que coa lesión de Uru e coa ausencia de Valentín Gutiérrez de onte, tiña pouca capacidade de crear perigo no xogo aberto. Neste contexto, unha patada longa ás costas de Diego Davila rematou cun erro propio do inexperto ala. En lugar de deixar saír, meteuna no campo para continuar o xogo, pero aquilo foi un agasallo para Saungweme, que recolleu e apoiou. O xogador vigués, menor de 20 anos, aprenderá que iso non se fai.
Despois, o Kaleido Universidade entrou nunha fase de atacar e atacar, encadeou tempo nos arredores da zona de marca visitante. Carlos Davila enviou un golpe de castigo ó pau horizontal da H e Maka Tatafu apoiou no curruncho, aínda que o árbitro -coa axuda do liña posto polo equipo visitante- sinalou que tras pisar fóra. 
E así, no ataque que podería dar a vitoria e a sentenza, o Kaleido perdeu o balón na dez metros de ensaio, os xogadores do CRAT atoparon oco e dous minutos despois asinaba o ensaio Sabadín no lado contrario do campo. Os coruñeses poñíanse por diante a tres minutos do final. Suficiente.

Kaleido Universidade de Vigo: 
Sito Moure, Tito Prieto (Acosta, min. 70), Brizuela, Salgado (Carlos López, min. 50), Casales (Giordano, min. 70), Antón Díaz, Carlos Davila (Villegas, min. 73), Tatafu; Riveiro, Barandiarán; Diego Davila (Miguel Abadía, min. 73), Mauro González, Caride, Calvo, De Cabo. .
CRAT A Coruña: 
Miranda (Julio Negreira, min. 41), Sobrino (Nicolás Negreira, min. 41), Filomeno, Von Kursell (Fraguela, min. 75), Saungweme, Guillamet, Enrique Fernández (Prado, min. 55), Carrizo; Rosado, Pablo Enríquez; Sabadín, Barrionuevo, Avaca, Riestra, Carlos Rivas (Artai, min. 41).
Anotacións: 
7-0, min. 2: ensaio de Tatafu, que pasa Carlos Davila; 7-3, min. 5: golpe de Avaca; 10-3, min. 24: golpe de Carlos Davila; 10-6, min. 31: golpe de Avaca; 13-6, min. 40: golpe de Carlos Davila; 13-11, min. 55: ensaio de Saungweme; 13-16, min. 77: ensaio de Sabadín. 
Árbitro: 
Ignacio Martínez. Amosou cartón amarelo a Carlos López (min. 56) do Universidade e a Nico Negreira (min. 78) do CRAT Universidade.