"A Terca" gaña en Chapela con autoridade e dispón de dous puntos de renda sobre Ares
O título de Liga Galega está moi preto do porto de Meira. A embarcación dirixida por Dani Pérez Fandiño obtivo a vitoria onte na Bandeira Concello de Redondela de traiñeiras e quedou como líder en solitario con dous puntos de renda sobre Ares a falta de tres regatas. Hoxe, ante o seu público, "A Terca" buscará incrementar a renda.
Coa vitoria de onte, os remeiros moañeses conseguen dar a volta a unha tempada na que son notablemente superiores, pero que estivo marcada pola descalificación na Bandeira Concello de Vigo por tomar mal unha rúa. Tras a cita do Vao, a traiñeira viguesa baixou á terceira posición e, coa vitoria de onte, volveu quedar en solitario no liderado da Liga Galega de Traiñeras. Agora defenderá a renda nas tres citas que quedan para revalidar o título.
Onte, en Redondela, o barco de Dani Pérez saiu con menos velocidade que en outras ocasións con Mecos marcando o ritmo da regata. O bote moañés pasou o ecuador da regata a un segundo do grovense e tomaron a última ceavoga no mesmo tempo, pero "A Terca" trocou o ritmo no rego definitivo para acadar unha vitoria clara e contundente.
Na loita polas posicións da zona baixa da táboa, Coruxo caeu á penúltima posición, mentres que Chapela, última, confirmou onte o seu descenso. A "Fontaíña" viguesa terá que afrontar a regata de hoxe e o vindeiro fin de semana o 'play-off' de permanencia de ascenso e descenso con Castropol e o segundo clasificado da Liga Galega B, neste caso, Muros.
Unha tempada complicada para a embarcación do Vao na primeira categoría do remo galego.n
